Thursday, April 05, 2007

فكر ..فكر ....قرر وتوكل


لاأعرف لماذا تذكرتها الان فقد مضى على هذه الواقعة أكثر من 10 سنوات ... كنت انا والعائلة في رحلة الى اسكندرية لقضاء أجازة صيف ووقعنا في فخ شركات تسويق" التايم شير "وكانت لقرية في شرم الشيخ ولاأخفي اعجابي بطريقة العرض التي تمت والتي كادت ان تجعلني امد يدي في جيبي وادفع للرجل عربون اتفاق وسط اغراءات عديدة من الخصومات والتقسيط والذي منه لولا انني كنت قد عودت نفسي على
قاعدة لااحيد عنها "اياك أن تأخذ قراراك تحت انفعال أو ضغط وخاصة لو كانت قرارات مالية " اعتذرت للشاب المجتهد ووعدته باني سأخذ قراراي غدا واعلمه وتحت الحاح شديد منه لمعرفة لماذا ارفض ان اوقع معه عقد فورا رغم اقتناعي بمايعرضه اضطررت لاخباره بقاعدتي الذهبية ... فاصر الشاب اصرارا تفهمت سببه بعد ذلك ان اكتب هذا السبب في الاستمارة التي كانت امامنا
انصرفنا انا وزوجتي وفكرنا واعتذرنا ونسينا الامر
احيانا كثيرة نجد انفسنا تحت ضغوط لحظية او انفعال (والانفعال صورة من صور الضغط الداخلي ) سواء في البيت او العمل او في اي مكان نجد انفسنا مدفوعين دفعا لاتخاذ قرار عاجل ...يشعرك من حولك حينئذ ان الدنيا ستنقلب راسا على عقب وان الكوارث ستحل وسوف يحدث و ... وخذها مني نصيحة ولا تخف في معظم الحالات لا يحدث شيء مما كان متوقعا وستجد ان الامور مختلفة عما تتصوره في البدايات ذلك ان القرارات التي تأخذ تحت انفعال وضغط غالبا ما تكون اقل نضجا وابعد عن الصواب من غيرها
فانت تستمع في حينها الى وجهة نظر واحدة ابن يشتكي لك من اخوه ....موظف يشعرك ان هناك مصيبة حلت به ... رئيس يضغط عليك لاتخاذ قرار فوري والا ضاعت الفرصة ...انت لاتعطي لنفسك فرصة كافية للتفكير وتقليب الامور ...لاتاخذ وقت كافي لاستشارة الاخرين .... لاتستمع الى وجهات نظر اطراف اخرى كل هذا تفتقده وانت تاخذ قرار تحت ضغوط اسرية او ضغوط عمل أو ماشابه
لاتتسرع وفكر قليلا وأهدا وقل سأخذ القرار غدا ستجد نفسك أكثر هدوءا وذهنك اكثر صفاءا فالقرارات المتسرعة غالباً ما تحتاج الى تغيير بعد ذلك ..لانها قرارات لم تأخذ حظها من التفكير وبالتالي سيكون مصيرها التغيير غالبا
و كله ده طبعا حاجة والقرارات المالية حاجة تانية وخاصة لما تكون تحويشة عمرك حينئذ يزداد الامر الحاحاً للتفكير الهاديء المحسوب
فكر ثم فكر ثم قرر وتوكل

19 comments:

mohamed elbanna said...

اولا صباح الفل
ثانيا الكلام ده شكله كده لومؤاخذه موجهه لى ولا ايه
قبل ما ترد فكر كويس يا هندسة
مدونه حلوه بجد
وان هحاول بجد

Anonymous said...

يعني اقتباس من الأستاذ محمد البنا ..
صباح الخير يا هندسة ..

المدونة المختلفة دي .. جامدة جدا .. ويا رب الواحد يقدر يستفيد من الكلام الجيد اللي بيتقال ..

بس هاقول ملحوظة صغيرة .. مش عارف بتحصل دايما .. معايا ومع غيري .. لما الواحد بيفكر في الحاجة كثير .. ممكن ما يعملش حاجة .. لإن الدافع يكون قد زال ..
هو الكلام دا مردود عليه بإن لو الدافع زال يبقى أنت ما كنتش في حاجة للموضوع من أساسه ..
الكلام دا كويس في المواضيع المالية .. بس يمكن لو في حاجة زي مدونة حضرتك دي .. أنا قرأتها وأعجبت بيها .. بس هاقعد أفكر شويتين هارد وأقول أيه ..
يبقى خلاص مش هارد ..

يعني ..

صباح الفل يا هندسة :)

علاء حمدان

Ahmed hassan said...

صباح الخير يابنا
بصراحة ياعني ....بصراحة مش لك انت فقط ياعزيزي الموضوع شايفه مهم ويبعمل مشاكل كثيرة احببت اكتب فيه
بص كان فيه ثلاثة في ذهني وانا باكتب
انت وحسام وحد ثالث مش هاقول هو مين
بالنسبة لك انت انت عارف طبعا السبب وطبعا حسام انت عارف ليه وهو عنده استبحس من اي حاجة فيها ادارة علشان كده قلت ابدأ بموضوع عائلي اجتماعي يخليه يكمل للاخر ويارب اكون نجحت

Ahmed hassan said...

علاء انت بتثير نقطة مهمة تستحق ان احنا نوضحها فعلا احنا هنا لازم نفرق بين الاتي
اولا نحن هنا نتحدث عن اتخاذ قرارات وبالتاكيد لانقصد كل مستويات القرارات فانت احيانا تشعر بالجوع فتقرر ان تشتري سندويتش فول ومش هاستنى لما افكر اجيب فول ولا طعمية ولا باذنجان انا هنا اتكلم عن مستوى معين من القرارات
ثانيا نحن نتكلم عن تجنب اخذ القرارات تحت الضغوط والانفعالات لكن نفترض انك تتحرك في وضع فيه ضغوط لن تتوقف بالتاكيد سيكون للامر حسابات اخرى
انت قرات البوست بتاعي وقررت ان ترد طبعا ترد لانك لو ماردتيش دلوقتي مش هاترد وبالتالي لن تفعل شيء
لازم نفرق هنا بين التفكير المتحررمن الضغوط والانفعالات وبين التفكير المعيق لانتهاز الفرص والبطيء والمتردد ده موضوع تاني لايتعارض مع فكرة البوست ده ولكنه قد يحتاج لكلام اخر

Horas said...

أشكر لك يا باش مهندس مهندس علي هذا البوست الجميل وفعليا في فترة من حياتي كنت أخذ قرارت تحت ضغوط وفب الغالب تكون غير ناضجة ولا سيما في الأمور المالية وتحديا المصيرية لذا فأنا أويدك وأشكرك وهذه النصيحة تفيديني كثيرا في عملي ولا سيما أني أعمل في البيع والشراء بجد فرقت معايا كتير
وكمان مهم اوي تعليق الأخ علاء ورد حضرتك عليه وهي مسألة التوازن في قضية التفكير هذا حسب نوع الأمر ودرجة الحاحه وهل هي فرصة ومحددة بوقت ودرجة اولوية الأمر عند الشخص عشان مش نعمل زي ار دي اي ونقعد نحسن ونفكر لما تروح الفرص وصدقت القاعدة في البزنس
time to market better than quality
تحياتي

Anonymous said...

اسعد الله اواقاتكم وعجل قراركم ورشد خطوكم وسدد رميكم
اما بعد يامولانا فمش عارف مين اللي قالك اني عندي مشكلة مع الادارة ، الموضوع كله في دائرة العلم والاكاديميا ، وفي هذه الدائرة انا اقتناعي ان الادارة والاعلام لايصلحان كعلوم اجتماعية ذات تراث وادبيات نظرية منضبطة ، وانها فروع تابعة لعلوم اصيلة ، وان نزعها عن سياق العلوم الاصيلة تلك والتعامل معها بمفردها هو ضلال يؤدي لتشوه مادتها وعدم اتساقها مع الحاجات الحقيقية للبشر
اما إن كان الامر في التشغيل،فلا مشاحة ولاحرج واللهم لا اعتراض
وبعدين انا مش عارف ايه اللي كان في ذهنك يعني عني وانت بتكتب البوست ده ، لكن على العموم بجد اسعدني اني ياتي طيفي على بالك في اي حال
اما الموضوع نفسه ، القرار بد التفكير ففيه عدة حكايات عندي حوله
خليني احكيها بعدين علشان دلوقت عندني كما تعلم دائما اجتماع

Ahmed hassan said...

حسام جزاك الله خيرا على هذه الدعوات المباركات وصدقني بيسعدني دائما مشاركتك لي في المدونة وعندما ذكرت انني افتكرتك وانا اكتب البوست فكان حقيقي فقط تذكرت كلامنا الاخير عن الادارة في اخر بوست كانت اكتبه في موضوعات الادارة "فن الممكن" ووعدي لك انني سأعلق يافطة على البوست ممنوع الدخول "كلام في الادارة "،بالغ سعادتي انه لايوجد لديك خصومة مع الادارة يتبقى ان نعرف فقط ايه الادارة الي انت تقصدها وايه الادارة الي انا اقصدها وانا لايشغلني ياعزيزي هل علم الادارة من العلوم الاصلية ام من العلوم الفرعية وهل له نظريات ثابتة لاتتغير ام لا مايشغلني فقط هو ان الادارة هي علم بغض النظر عن كونه فرعي ام اصلي المهم انها علم له قواعد عامة واطر واسعة جدا وليست افتكاسات من هنا او هناك وانا مثلك لدي حساسية كبيرة من القواعد النظرية والمسلمات البديهية ومنطق "هي كده " ولو تابعت مااكتبه في موضوع الادارة ستجده على ماأظن امر مختلف شوية عن القواعد والاصول النظرية لكن احيانا يتناول بعضنا الادارة على انها حاجة كده زي فطرة الانسان وان الواحد يدير بالفطرة هذه من وجهة نظري السذاجة بعينها فادراة البشر ووضع مستهدفاتهم وقيادتهم بمفهوم فريق العمل ومتابعة الانجاز كل هذه الاشياء لاتأتي من وحي اللحظة ...هو ده الي يستحق مننا النقاش والحوار ، ليس معنى انني مبرمج شاطر انني قادر على ادارة فريق مبرمجين وليس معنى انني محرر كويس انني قادر ان ادير مؤسسة اعلامية فقط لكوني مبرمج او محرر ناجح الادارة بالتاكيد تطلب مقومات اخرى كثيرة قد يفرد لها تفصيل في مكان اخر .... احنا بعدنا عن الموضوع الاصلي للبوست واتمنى ان اسمع رأيك فيه
شكرا لك

Anonymous said...

هندسة
صباحه اشطه وحشني جداجدا جدا
انا معاك ان الواحد لازم يفكر قبل لما ياخد قرار بس الواحد لازم برده يسبها للبركة وحسب التساهيل وربنا بيكرم صدقني انا عاوز اقولك انا اشتريت شقة وانا جالس منتظر اركب في المطار يعني في نصف ساعة تقريبا ومن غير ما اشوفها ولا اي حاجة وفي مكالمة تليفون كمان ومكنتش بفكر في الموضوع قبل كده كل الحكاية اني حولت احل مشكلة بين اثنين عزاز عليا كانوا هيزعلوا من بعض وسبحان الله سعر الشقة الان زاد النصف تقريبا ماشاء الله
يعني الموضوع نسبي ياباشا ويجعله عامر ووحشني بجد بجد
عمرو منير

Ahmed hassan said...

صباح الخيرات والبركات ياعمر
وحشني كثير ياعزيزي وعايز اطمن عليك وعلى قرينك هشام البيه سلملي عليه كثير
ياعمنا انت فهمت غلط الموضوع ده مش موجه لك ده موجه للناس العادية ان الواحد لازم يفكر ثم يقرر
اما الناس الي مش عادية زي عمر منير ده موضوع تاني خالص دي ناس بينها وبين ربنا عمار والسما مفتوحة ولو حاولت تعمل الي احنا قاعدين نحكي فيه في المدونة دي الدنيا هاتعك معاها انت ياعمنا رمز لحزب البركة والتساهيل مش بس في موضوع الشقة لا ده في كل حاجة انت انسان لك مدرسة خاصة في الحياة وصدقني بجد انا باتعلم منها بس ماعرفش اعمل زيك
وطمني عليك دوما

Anonymous said...

اكيد انا موافق معاك جدا ان الصحفي المهني الشاطر لايصلح بالضرورة لإدارة مؤسسة اعلامية ، والعكس صحيح ، وكذلك الامر على الطبيب والمستشفى والمحاسب والشركة وهكذا ، فهي مهارات ورغبات واختيارات وتعلم ، والحرفية المهنية شيء والحرفية الادارية شيء آخر ، وغالبا من هو موهوب في المهنة غير من هو موهوب في الادارة ومن يرغب في ممارسة تلك يصعب ان تأخذه الرغبة في ممارسه هذه ، واعتقد انك نفسك خير مثال على ذلك
اما حكاية العلوم وهل هي تابعة ام مستقلة فهذا امر يعنيني جدا ، واعتقد انه شبب الخلاف الرئيس بيني والجامعة واللي خلاني ما اكملش الدكتوراه ، لأني شخصيا مهتم جدا بالنظرية وتاريخ العلوم وارتباطها ، وللاسف في مصر المحروسة قليل جدا من يهتمون بهذاوبالتالي هناك خلل علمي حقيقي في معظم العلوم الانسانية والتطبيقية على السواء ، وهو امر يستحق مناقشة منفرده إن سمحت الظروف
المهم يا سيدي خليني احكيلك شوية من تاريخي الشخصي علشان اؤكد موافقتي التاريخية على ما تقول ، فمثلا انا كنت طالب شاطر في معظم سنين الدراسة ( على فكرة ليست ميزة اطلاقا انك تكون الاول في الكلاس على طول ، ولا اريد لأبني او بنتي ان يكون كذلك بالضرورة فهذا ليس معيارا حقيقيا للتميز ) ، ولحد الثانوية العامة كنت كذلك ، وبالتالي وفقا للعرف السائد كان ضروري ادخل كلية الهندسة لأن مجموعي يؤهلني لها ، ولأني كنت علمي رياضة ، لكن يشاء الله ان يهديني لأرشد من هذا مثلا ، فصجمت اهلي اني ناوي ادخل كلية الاداب لأني عاوز ادرس علوم اجتماعية ، ولأني مش عاوز رخصة من الحكومة تقول اني درست في الجامعة لكن عاوز اتعلم بجد ، وطبعا كانت معركة هائلة استمرت لزمن طويل ، خصوصا اني رفضت كمان ادخل كلية الاعلام في القاهرة لأنها لاتقدم علوم اجتماعية بالمعنى الحقيقي لكنها تتعامل مع قضايا فرعية وحرفية في الاعلام فقط ، وظل الضغط متواصلا حتى تخرجت رغم اني كنت باجيب امتياز وباكون اول الدفعه ،وهذا فضل الله عندما ينير لك البصيرة ويعطيك ارادة الاصرار ، فلأمر ليس فقط قرار لكنه تسديد من الله
على هذا المنوال تكرت المواقف ، حيث رفضت ـ إلى الان كما تعلم ـ ان احصل على شقة صغيرة مثلا في اي مكان رغم ضغوط هائلة من اصدقائي ومن حولي ، وفضلت العيش في شقة جيدة جدا لكن ايجار جديد مازلت فيها للأن في انتظار ان ينتهي بناء بيتنا في اكتوبر
فما تعلمته بفضل الله اني لااخذ قرارا مفصليا ايا كان إلا بعد 24 ساعة ، وفي نفس الوقت لاآخذ قرارا لأن الاخرين يفعلون مثل ذلك ، لكن بالتحديد ماذا اريد انا بصرف النظر عما يفعل الناس، واعتقد ان هذه الطريقة انعكست على حياتي ، حيث بفضل الله لم اندم على اي قرار بهذا الشكل ، وبفضل الله احصل على ما اتنمى في الوقت الذي يقدره الله لي، سواء في العمل او في البيت او في الاسرة او في الحياة عموما ، والله المستعان

Anonymous said...

استاذ حسام
السلام عليك ربنا يكرمك يافندم ويوفقك في الحياة بس انا حاسس انك مصعب الدونية شويتين ولا انا متهيألي مش لازم الانسان ياخد باله قوي من الموضوع كده وبعدين هو انت لما مكنتش عاوز تدخل هندسة دخلت علمي رياضة ليه وتعبت نفسك في المذاكرة هو انتم ليه غاويين تتعبوا نفسكم وكنت بتطلع الاول ليه لما مكملتش تعليمك واخدت الدكتوراة ايه ده ياجماعة انت لو ليه محسسني ان الدنيا صعبة كدهعاوز تتثقف اقرا وسيبك من العلام وسنينه بس تتعب وتذاكر وتطلع من الاوئل وبعد كده تخيب امل اهلك فيك ليه كده يبني دا حته من باب بر الوالدين كنت دخلت كلية الهندسة او اخدت الدكتوراة انا معرفش حضرتك استاذ حسام واتمنى ان تتاح ليه الظروف اني اتعرف على حضرتك بس لغاية لما نتقابل ليه عملت كده في نفسك
دا انت تلاقيك كنت بتذاكر يجي 5 ساعات في اليوم ولا حاجة لاحول ولا قوة الا بالله العلى العظيم ليه ياجماعة الصعبانيات دي
عمرو منير

Anonymous said...

اخي عمرو ، يكفيني شهاده احمد حسان فيك حتى اعرفك واقدرك ، اما حكاية ان الدنيا صعبة فبالعكس ، الحمد لله انا شايفها غير كده خالص ، بس المهم تبقى عارف انت عاوز ايه منها ، انا كنت عاوز ابقى اعلامي شاطر فاهم وظيفة الميديا في المجتمع وبيعرف يتعامل معاها بمهاة ، وقد كان والحمد لله ، وعندي هواية اخرى في العمل السينمائي وثانية في البحث الاكاديمي وامارسهما بمتعة والحمد لله ، وبالتالي ليس هدف التفوق ان تكون استاذا جامعيامثلا ، واكيد ليس من بر الوالدين انك تسمع كلامهم لمجرد انهم خايفين عليك او ان الناس بتعمل كده فبيعملوا زيهم ، المضمون يعني ، لكن من بر الوالدين ان لاتخيب رجائهم فيك وتنجح وتتميز فيما تفعل وتعيش حياة يتمنياها لك ، وقد كان بفضل الله ،وبالتالي تغيير المفاهيم التقليدية لصالح ان تكون نفسك وما تريد هذا في ظني غاية الاستخلاف في الارض والعمل على إعمارها ، وهو من تمام العبودية لله ، والله اعلم
اما لماذا تتفوق إذا مش حا تكون مهندس او تاخد الدكتوراه ، فإجابتي ببساطة ان التقسيم بتاع علمي وادبي وان بعضه اسهل من بعض ده كلام فارغ ، العلم مافيهوش سهل وصعب ، كل العلوم سواء ، وانت وما تريد ، صحيح لأني كنت في مدرسة المتفوقين ، وطبقا للتقسيم الخزعبلي ده ، ما كانش في المدرسة قسم ادبي اصلا ، لكن انا فعلا كنت ومازلت باحب ادرس رياضة ، وهي كما تعلم فرع اساسي من فروع الفلسفة،كما ان التفكير المنهجي العلمي التجريبي افادني كتير في دراستي الجامعية وفي حياتي بشكل عام ، وهذا هو مربط الفرس ، ماذا نتعلم ولماذا نتعلم ، لذلك لما تصادمت مع الاساتذه في الجامعه عملت الدراسة اللي انا عاوزها ونشرتها في دوريات علمية محكمة ومحترمة جدا ، ومش مهم احط قبل اسمي دال يعني ايه قيمتها إذا ما عملتش اللي باحبه اولا واللي اظن انه ينفع الناس ثانيا، فالحياة ببساطتها كما تعلمتها ، افعل ما تحب واخلص له ، ستحصل على الثمرة التي تتمنى طال الاجل او قصر ، وقد ذقت من الثمار بفضل الله ما يجعلني اختار نفس الاختيارات لو استقبلت من امري ما استدبرت
باقي الاجابة سأتركها لأخي حسان

Anonymous said...

استاذ حسام
انا مقدرش انكر ان كلامك مقنع ومترتب كده وشكله حلو يعني الي يقرها لازم يسلم على طول بصراحه وانا بحترم انك عارف انت عاوز ايه من الدنيا وبتحاول توصله ودي حاجة كويسة في حد ذاتها انا مقدرش انكر بس انا مازلت مختلف مع حضرتك في موضوع المذاكرة ده وانك تمشي في طرق ومتكملوش للاخر يعني حضرتك دخلت علمي رياضة طبعا استفدت من الدراسة بس اكيد كانت الاستفادة هتكون اكبر لو دخلت هندسة وخصوصا ان مجموعك يدخلك هنقول انك كنت صغير ولسه الاختيارات مشوشة رغم ان العكس هو الي ظاهر انك غيرت المسار بأرادتك تقوم لما تكمل في الطريق الي انت عاوزه وتقرب تاخد الدكتور تروح قالب الترابيزة وخالع من الموضوع اهي دي مش مبلوعة خالص وعلى العموم طبعا كله بقدر الله
وان شاء الله ربنا يوفقك في كل خطواتك بس كل الفكرة اني اتمنى على حضرتك انك مش لازم تحسبها قوي هي دي وجهة نظري الي ممكن تكون غلط بس انا مش بحاول افضل احسبها قوي كده مش معنى كدهاني لاغي تفكيري بس انا لما بحس بحاجة بعملها واكمل فيها وربنا بيكرم كان ابويا الله يرحمه بيقول (ان ربنا مع عبده الغفلان )يعني الي سيبها لله بيشتغل صحيح وبيحاول بس سايبها لربنا يمشيها زي ما هو عاوز
اخيك عمرو منير

Ahmed hassan said...

ياجماعة ده بوست تاريخي ..ان يجلس ا/ عمرو منير يتناقش مع ا/ حسام حاجة جميلة جدا لقاء رائع بين مدرستين ( ومحدش هايفهم كلامي غير الي عارف الاثنين)
نقاش بين التساهيل وربك ييسرها ومتحبكهاش ومتفكرش كثير علشان دماغك ماتفوتش وبين التفكير و المنطق العقلاني والمداخل المبدئية والمقاصد والعلوم النظرية والسياق والاتساق و.. ...حاجة كده ماتركبش خالص لكنها ركبت سبحان الله والناس بتتناقش وتتحاور حكمتك يارب

Ahmed hassan said...

حسام
بقدر مااسعدني معرفتي بتفاصيل خاصة بك لم اعرفها من قبل بقدر ما زعلت من نفسي انني لم اكن اعرف هذه التفاصيل عنك طوال فترة وجودنا معا في الشركة لعدة سنوات
الوم نفسي واتامل في حكمة الله ان يحدث هذا بعد سفري لخارج مصر ....تقارب عن بعد
شكرا لك وكل التوفيق والسداد لك ولاسرتك الكريمة

Ahmed hassan said...

عمرو
كله كوم وموضوع حكمة ابوك الله يرحمه "ان ربنا مع عبده الغفلان " ينهار ابيض دي جديده خالص وواضح ان الموضوع ورائة يعمرو وربنا يرحمعه رحمه واسعة :)
سعيد والله بوجودك معايا وخلينا على تواصل

Anonymous said...

free good money on forex
http://freemoneyforx.blogspot.com

Anonymous said...

free good money on forex
http://freemoneyforx.blogspot.com

Hammuda said...

إذا كنت من خريجي مدرسة المتفوقين راسلني على:
fm_com_28@yahoo.com
لأننا نريد تنظيم حفل لخريجي المدرسة